ეს 7 წიგნი ხელოვნებაზე აუცილებლად უნდა წაიკითხო

Steal Like An Artist - Austin Kleon

თუ კრეატიულობის პროცესში ოდესმე გიფიქრია, რომ "ყველაფერი უკვე გაკეთებულია", ეს წიგნი სწორედ შენთვისაა.

Austin Kleon გვახსენებს, რომ ორიგინალურობა არ ნიშნავს იდეების არაფრისგან შექმნას. პირიქით, ყველა შემოქმედი სწავლობს, აკვირდება, შთაგონებას იღებს სხვების ნამუშევრებიდან და შემდეგ ამ გავლენებს საკუთარ გამოცდილებასა და ხედვასთან აერთიანებს. სწორედ ასე იბადება ახალი, უნიკალური ნამუშევრები. 

წიგნი აგებულია 10 მარტივი, პრაქტიკული პრინციპის გარშემო. Kleon საუბრობს იმაზეც, რატომ არ უნდა დაელოდო "სრულ მზადყოფნას", რატომ არის მნიშვნელოვანი გვერდითი პროექტები, ხელით მუშაობა, ყოველდღიური პრაქტიკა და საკუთარი ნამუშევრების გაზიარება. ეს რჩევები მხოლოდ მხატვრებს არ ეხებათ, ისინი ნებისმიერ შემოქმედებით სფეროში გამოგადგება. 

მიუხედავად იმისა, რომ წიგნი ძალიან მოკლეა, ის სავსეა ილუსტრაციებით, მაგალითებითა და ისეთი იდეებით, რომლებიც კითხვიდან მალევე პრაქტიკაში გადაგაქვს. სწორედ ამიტომ, "Steal Like an Artist" ხშირად ითვლება ერთ-ერთ საუკეთესო წიგნად მათთვის, ვინც ახლა იწყებს შემოქმედებით გზას ან სურს, საკუთარ კრეატიულობას ახალი ენერგია შესძინოს. 

Big magic - Creative Living Beyond Fear - Elizabeth Gilbert

თუ შემოქმედებითი პროცესის დაწყებისას ხშირად გაჩერებს შიში, საკუთარ თავში ეჭვი ან იმის განცდა, რომ საკმარისად კარგი არ ხარ, ეს წიგნი აუცილებლად უნდა წაიკითხო.

Elizabeth Gilbert, ცნობილი რომანის "Eat, Pray, Love"-ის ავტორი, ამ წიგნში საუბრობს იმაზე, რომ კრეატიული ცხოვრება არ ნიშნავს შიშის არარსებობას. პირიქით, შიში ყოველთვის იქნება, მაგრამ არ უნდა მისცე უფლება, შენი გადაწყვეტილებები მან მიიღოს. მისი მთავარი გზავნილია: შემოქმედებას სჭირდება ცნობისმოყვარეობა, გამბედაობა და მოქმედება, მაშინაც კი, როცა საკუთარ თავში ბოლომდე დარწმუნებული არ ხარ.

წიგნი სავსეა ავტორის პირადი ისტორიებით, გამოცდილებითა და პრაქტიკული რჩევებით, რომლებიც გეხმარება, კრეატიულ პროცესს ნაკლები წნეხით შეხედო და უფრო თავისუფლად გააგრძელო შემოქმედების პროცესი. Gilbert არ გვთავაზობს "წარმატების ფორმულას," ის გვასწავლის, როგორ ვისიამოვნოთ თავად შემოქმედებითი გზით.

"Big Magic" განსაკუთრებით შთამაგონებელია მხატვრებისთვის, დიზაინერებისთვის, მწერლებისთვის და საერთოდ ყველასთვის, ვისაც სურს, შიშის მიუხედავად, საკუთარ იდეებს სიცოცხლე შესძინოს.

The Artist's Way - Julia Cameron

თუ გრძნობ, რომ შემოქმედებითი ბლოკი გაქვს, იდეები აღარ მოგდის ან უბრალოდ ვერ ბედავ დაწყებას, "The Artist's Way" ერთ-ერთი ყველაზე გავლენიანი წიგნია, რომელიც შეგიძლია ასეთ შემთხვევაში წაიკითხო.

Julia Cameron ამ წიგნში გვთავაზობს 12-კვირიან პრაქტიკულ პროგრამას, რომელიც შექმნილია იმისთვის, რომ ეტაპობრივად დაგეხმაროს შემოქმედებითი ბლოკების დაძლევაში, თავდაჯერებულობის დაბრუნებასა და საკუთარი კრეატიული პოტენციალის აღმოჩენაში. წიგნი მილიონობით ადამიანმა წაიკითხა და უკვე ათწლეულებია, კრეატიულობის განვითარების ერთ-ერთ ყველაზე ცნობილ გზამკვლევად ითვლება.

სწორედ Cameron-მა გააცნო მსოფლიოს ცნობილი პრაქტიკა Morning Pages - ყოველდღიურად დილით სამი ხელნაწერი გვერდის თავისუფლად წერა, რაც გონების გაწმენდასა და ახალი იდეებისთვის სივრცის მიცემას ემსახურება. წიგნის კიდევ ერთი მნიშვნელოვანი პრაქტიკაა Artist Date - საკუთარ თავთან რეგულარული, შემოქმედებითი "პაემანი", რომელიც ცნობისმოყვარეობასა და შთაგონებას აღვივებს.

"The Artist's Way" მხოლოდ წასაკითხი წიგნი არ არის, ის პრაქტიკული გზამკვლევია. თუ მზად ხარ, ყოველდღიურად მცირე ნაბიჯები გადადგა და საკუთარ შემოქმედებით მხარეს მეტი დრო დაუთმო, ეს წიგნი ნამდვილად შეიძლება გარდამტეხი აღმოჩნდეს შენს ცხოვრებაში.

Keep Going - Austin Kleon

ყველა შემოქმედს აქვს პერიოდი, როცა მოტივაცია იკლებს, იდეები აღარ მოდის და მუშაობის გაგრძელება რთული ხდება. თუ ხშირად გიჩნდება კითხვა: "რა ვქნა, როცა მუზა აღარ მოდის?" "Keep Going" სწორედ ასეთ მომენტებში დაგეხმარება.

Austin Kleon ამ წიგნში გვიზიარებს 10 პრაქტიკულ რჩევას, რომლებიც გვასწავლის, როგორ შევინარჩუნოთ შემოქმედებითი რიტმი მაშინაც კი, როცა შთაგონება დროებით გაქრა. მისი მთავარი გზავნილია, რომ კრეატიულობა მხოლოდ მოტივაციაზე არ უნდა იყოს დამოკიდებული, ბევრად მნიშვნელოვანია ყოველდღიური ჩვევები, დისციპლინა და პროცესის სიყვარული.

წიგნში ავტორი საუბრობს ისეთ თემებზე, როგორიცაა ინფორმაციული გადატვირთვისგან თავის დაცვა, დასვენების მნიშვნელობა, საკუთარი პატარა საზოგადოების შექმნა, ბუნებასთან კავშირი და ყოველდღიური მუშაობის ჩვევის ჩამოყალიბება. რჩევები მარტივია, მაგრამ პრაქტიკული და რეალურად გამოსაყენებელი.

"Keep Going" განსაკუთრებით გამოგადგება, თუ უკვე დაიწყე ხატვა ან სხვა შემოქმედებითი საქმიანობა და გინდა, რომ დროებითმა სირთულეებმა არ გაგაჩეროს. ეს წიგნი შეგახსენებს, რომ ყველაზე მნიშვნელოვანი არა მოტივაცია, არამედ გაგრძელების უნარია.

Daily Rituals: How Artists Work - Mason Currey

ოდესმე გიფიქრია, როგორ მუშაობდნენ პაბლო პიკასო, ვოლფგანგ ამადეუს მოცარტი, ერნესტ ჰემინგუეი ან სტივ ჯობსი? "Daily Rituals" სწორედ ამ კითხვაზე პასუხობს.

Mason Currey ამ წიგნში აგროვებს 160-ზე მეტი ცნობილი შემოქმედის, მწერლის, კომპოზიტორის, მხატვრის, მეცნიერისა და მეწარმის ყოველდღიურ ჩვევებსა და სამუშაო რუტინებს. წიგნი გვაჩვენებს, როგორ ანაწილებდნენ ისინი დროს, როდის მუშაობდნენ, როგორ ისვენებდნენ და რა ჩვევები ეხმარებოდათ შემოქმედებითი პროცესის შენარჩუნებაში.

ყველაზე საინტერესო ის არის, რომ წიგნი ამსხვრევს მითს, თითქოს წარმატებისთვის ერთი "სწორი ფორმულა" არსებობს. ზოგი დილას მუშაობდა, ზოგი - გვიან ღამით; ზოგი მკაცრ გრაფიკს იცავდა, ზოგი კი სრულ ქაოსში ქმნიდა. მიუხედავად განსხვავებული მიდგომებისა, თითოეულ მათგანს საკუთარი, მათზე მორგებული რიტუალი ჰქონდა.

"Daily Rituals" განსაკუთრებით შთამაგონებელია მათთვის, ვისაც საკუთარი შემოქმედებითი რუტინის შექმნა სურს. ეს წიგნი შეგახსენებს, რომ წარმატება ხშირად შთაგონებაზე ნაკლებად, ხოლო მცირე, ყოველდღიურ ჩვევებზე უფრო მეტად არის დამოკიდებული.

Creative Confidence - Tom Kelley & David Kelley

ბევრს ჰგონია, რომ კრეატიულობა თანდაყოლილი ნიჭია, რომელიც მხოლოდ მხატვრებსა და დიზაინერებს აქვთ. "Creative Confidence" ამ მითს ამსხვრევს და გვაჩვენებს, რომ კრეატიული აზროვნება ყველას შეუძლია განივითაროს.

წიგნის ავტორები, Tom Kelley და David Kelley, დიზაინკომპანია IDEO-ს დამფუძნებლები და ლიდერები არიან. ისინი საკუთარი მრავალწლიანი გამოცდილების საფუძველზე გვასწავლიან, როგორ დავძლიოთ შეცდომის შიში, როგორ ვიფიქროთ უფრო შემოქმედებითად და როგორ გადავაქციოთ იდეები რეალურ მოქმედებად.

წიგნი არ არის მხოლოდ დიზაინერებისთვის. მასში აღწერილი მეთოდები გამოგადგება, თუ გინდა უფრო თავისუფლად მიუდგე პრობლემების გადაჭრას, ახალი იდეების შექმნასა და გადაწყვეტილებების მიღებას, იქნება ეს სამსახურში, ხელოვნებაში, საკუთარ პროექტებში თუ ყოველდღიურ ცხოვრებაში.

"Creative Confidence" შთაგაგონებს, რომ კრეატიულობა განსაკუთრებული ადამიანების უნარი კი არა, უნარია, რომლის განვითარებაც პრაქტიკითა და სწორი მიდგომით ყველას შეუძლია. სწორედ ამიტომ, ეს წიგნი ერთ-ერთი საუკეთესო არჩევანია მათთვის, ვისაც საკუთარი შემოქმედებითი თავდაჯერებულობის ამაღლება და გაძლიერება სურს.

Show Your Work - Austin Kleon

ბევრი შემოქმედი საკუთარ ნამუშევრებს მხოლოდ მაშინ აჩვენებს სხვებს, როდესაც ყველაფერი დასრულებული და იდეალურია. Austin Kleon კი გვთავაზობს სრულიად განსხვავებულ მიდგომას: არ დამალო შემოქმედებითი პროცესი - გააზიარე ის, რასაც სწავლობ, ქმნი და გზად აღმოაჩენ.

წიგნი აგებულია 10 პრაქტიკულ პრინციპზე, რომლებიც გეხმარება, საკუთარი საქმიანობა სხვებისთვის ხილული გახადო ზედმეტი თვითრეკლამის გარეშე. ავტორი გვირჩევს, არ ვიფიქროთ მხოლოდ საბოლოო პროდუქტზე, საინტერესო შეიძლება იყოს იდეის დაბადება, სამუშაო პროცესი, გამოყენებული მასალები, შეცდომები, მცირე პროგრესი და ის წყაროებიც, რომლებიც შთაგაგონებს. 

Kleon ასევე გვახსენებს, რომ კრეატიული საქმიანობა იზოლაციაში არ ვითარდება. როცა რეგულარულად აზიარებ შენს ნამუშევრებს და ცოდნას, უფრო მარტივად პოულობ თანამოაზრეებს, აუდიტორიასა და ადამიანებს, რომლებსაც შენი საქმიანობა ნამდვილად აინტერესებთ. წიგნი განსაკუთრებით სასარგებლოა მათთვის, ვისაც საკუთარი ნამუშევრების ონლაინ წარმოჩენა სურს, მაგრამ არ მოსწონს აგრესიული თვითრეკლამა. 

Show Your Work! იდეალური არჩევანია მხატვრებისთვის, დიზაინერებისთვის, მცირე ბიზნესის მფლობელებისა და კონტენტ კრეატორებისთვის, რომლებიც Instagram-ზე, TikTok-ზე ან სხვა პლატფორმებზე იწყებენ აქტიურობას. ავტორის მთავარი გაკვეთილია: ნუ დაელოდები სრულყოფილებას . აჩვენე შენი გზა და არა მხოლოდ საბოლოო შედეგი.

სიყვარულით, არტოპია